Item, dil zonzer di provisionati ivi in Portovenere mandati da Zenoa.
     
      Item, di la mala compagnia fano zenoesi a' nostre zurme; voleva licentia et non andar più a Zenoa, che saria total ruina di quella armata si l'andasse.
     
      Da Roma, di 8 et 9, volendo il campo dil papa dar la bataja a Isola, quelli mandono soi noncii per acordo, e speravano similiter farano i altri lochi de Orsini etc.
     
      Di Cajeta, di 6 et 7, el re don Federico partiva per Trajecto a la volta di Rocha Vielma, et romagnando Maximian in Italia, era contento contribuir la portion soa.
     
      Item, dil partir di sua majestà dil Posterla orator milanexe.
     
      Da Bologna, di provisione fevano fiorentini de danari, et solicitavano el roy a vegnir in Italia, zoè vegnir a Lion et lì fermarse, offerendoli danari.
     
      Item, che Vitelozo Vitelli e Carlo Orsini non erano tanto soliciti a la expeditione contra le zente pontificie, come prima erano.
     
      Da Ferrara, di Zuam Mocenigo vice domino nostro, come par il ducha voria trovar mezo di ritornar in gratia con la Signoria, e di rasonamenti con lo episcopo di Trani e de lì.
     
      Da Ravena, che le zente si facea a Lugo per mandar verso Castrocaro, nel qual erano soldati alcuni di Faenza, etiam alcuni Caldori e Zuam Albanese, né se sapea a che effecto.
     
      Da Cajeta, come Polo Capelo orator nostro havia visto el corpo di Gem soltan fradelo dil Turcho, imbalsamato in cassa plumbea, custodito da certi turchi per caxon fusseno testimonii.
     
      [428] In questo zorno, a dì 16, nel consejo di pregadi fu preso che Alvise Sagudino secretario nostro, el qual andava al sanzacho di Scutari per la causa di Zerniza, che si non potea otegnir ivi, si transferissa a la Porta dal Signor turcho, et che, acadendo, se faza la spexa di presenti consueti.