Item, che procuravano condur da Liburno con scorta li formenti a Fiorenza dove era gran penuria; breviter, Pisa steva molto male.
     
      Da Zenoa, di 11, 12, dil zonzer lì de uno galion de' francesi partiti dil regno per ritornar in Provenza. Come havia dato la paga a li provisionati, et acresuto il numero per la dubitatione si ha di domino Baptistino et il Vincula, quali si dize vegnir con favori gallici a quella impresa, maxime essendo discordia tra quelle parte e domino Jo: Alovisio dal Fiescho, et pur si parlava di asetar, et domino Coradolo Stanga prothonotario comissario dil ducha de Milano, vedeva di adatar ditte discordie etc.
     
      Da Milan, di movimenti superiori, et che passavano zente in Italia, et che 'l ducha li parea di mandar zente verso Novi per trazer la rocha di man di Fregosi, et aver custodia a quel passo per asegurar le cosse di Zenoa.
     
      Item, rizerchò la Signoria a dir che favor li presteria in caxo che 'l fosse molestado da Franza, inferendo il passar di nostre zente.
     
      Da Riva, come el ducha Zorzi di Baviera era morto.
     
      Item, passar al continuo zente dil re Maximiano a la volta di Como per andar a trovar esso re. Questo medemo si have per lettere di Hironimo Griti podestà a Roverè.
     
      Da Ravena, dil continuar se fa verso Bertonoro e Lugo di far zente per quelli de madama di Forlì, qual se fevano per el signor Octaviano suo fiol, et [430] tenivano la volta di Castelnovo e Castrocaro. Si dubitava de intelligentia di dita madona con fiorentini et con francesi, maxime per aparer in quelle parte uno francese da conto che solicitava il far di ditte zente, azonzendo il favor dil ducha di Ferara.