Item, el partir dil ditto cardinal e domino Baptistino per Avignon per Marseja, dove dovea montar su l'armata preparata lì, zonta etiam parte di quella di Bertagna, zoè 7 in 8 legni, e che speravano per dì 5 zener havesse expedito ditto disegno, per li favori haveano per ditta cità. Et per l'armata era stà previsto di 2000 bovi salati tolti de Alvernia, e porzi etiam salati.
     
      Item, che a quelli consulti interveniano alcuni patroni di nave zenoesi, et l'orator ferarese.
     
      Item, che 'l re partì da Lion e andò verso Colomba, verso la Provenza, per transferirse et proximarse in Italia, et che fenzea di andar per veder la Provenza, ne la qual, poi ch'era re, non era plui stato. Iudicha, otignando Zenoa, statim verà in Italia, e non aspeterà tempo nuovo.
     
      Item, che monsignor de Serenon, zonto sarà in Aste, ha ordine far più numero di zente secondo li parerà.
     
      Item, che 'l ducha di Milan tentava, per mezo dil ducha di Savoia, tratar matrimonio per uno suo fiolo in la fia del ducha de Barbon, qual non ha abuto effecto, essendo stà impedito per el ducha de Orliens et altri.
     
      Item, che Maximiano non è stimato, anzi esserli parso pocha reputation de imperator haverse fato capo di la comunità de' venitiani e Milan, e che 'l re di Franza faria con li electori de l'imperio, maxime l'archiepiscopo maguntino, che 'l torneria in Alemagna. Che de Yspania se facea pocha stima, maxime poi la abuta de Sanses e la trieva fatta, la qual se dicea detti reali aver abute a malle, et per questo a Molines era stà cridà guerra con Franza, et ordenadi grandi aparati.