Per tanto, credeano quel loco presto se daria, et consequenter el stato de' Orsini esser aquistado, et che la ditta dona andava a Petiliano loco dil conte Nicola Orsini governador di le zente nostre, era a Gedi in brexana.
     
      Item, che la aspetation di Carlo Orsino et Vitelozo Vitelli era manchata, perché parea quelli non poteano esser in hordine per socorer el stado suo.
     
      Item, come monsignor di Obignì havia fatto reverentia al pontifice, qual era stato in secreto coloquio per bon spazio, zoè el pontifice, el cardinal Ascanio vice cancelier, l'orator yspano et quello di Napoli.
     
      Item, che dovea zonzer lì a Roma el cardinal Borgies, qual era stato legato a Napoli, et dovea esser acetado honorifice dal concistorio.
     
      Item, che 'l pontifice laudava la Signoria nostra di le operatione fate per salute de Italia, intesa la promission fata a Maximiano de la portione di ducati 21 milia restando de qui, inferendo esser prontissimo, non meno di papa olim Alexandro III, ai comodi di questo stado.
     
      Da Pisa, di 16, 17, che fiorentini, con squadre venti fanti 1000 e plui e cavali lizieri, haveano preso alcuni lochi de le coline, zoè Lorenzana, San Regulo e Tremoleto a pati. Item, San Lucha a sacho crudelmente, e doveano andar a campo a Sojana e Morona. Che Zustignan Morexini proveditor era a Cassina per proveder a Vico e Buti, loci più importanti, et breviter tutto se perderà, perché nostri vano via per desasio de strami e danari.
     
      Item, che pisani haveano designato l'orator lhoro iterum qui per recomandarse a la Signoria, et erano in grande ansietà, vedendo le cosse lhoro andar male.