Item, parer el ducha di Savoia non patir francesi in suo ducato per el danno del paese, et che, sequendo el tratato contra Zenoa di Vincula e Batistin, statim Zuam Jacopo di Traulzi, qual era in Aste, romperia a Milan per dar in più parte.
     
      Da Zuam Piero Stella secretario nostro apresso il re di romani, vene lettere di 17, 18, 19 date a Belasio, lontan da Como una zornata verso Chiavena sul lago. Primo, dil zonzer lì dil re, qual dovea andar a Chiavena et procurar che venisse lì, over a Como, i principi di la dyeta de Lyndò per consultar de agendis; come esso re li havia piaciuto la promessa di la portione di 21 milia ducati, et replicò pluries li fosse mandati a Milan per i duo mesi.
     
      Item, come havia dato licentia a li soi oratori erano in questa terra, videlicet el vescovo di Trento et il capitano de Igna, et questo perché lhoro l'haveano recerchada.
     
      Item, di alcuni coloquii, et che 'l re diceva amava molto la Signoria.
     
      Item, che l'havia designato do oratori qui, uno fratelo di messer Zuam Bontemps, et l'altro domino Hironimo Vento, et vieneno sì per li danari, qual per veder et intender che, stando sua majestà in Italia, voleva obligar la liga a certa portione de cavali e fanti. Postremo, ditto secretario scrisse credeva el re anderia in Alemania, per star in Italia con pocha reputation et contra il voler de tutta [436] Alemania: pur havia apresso de sì el signor Galeoto de la Mirandola et il conte di Cajazo per nome dil ducha de Milano, qualli procuraveno el restasse in Italia.