Item, di l'acordo di Adorni et Fieschi in [458] Zenoa firmato, et aver mandato uno suo a domino Baptistino per oferirli da novo acordo aciò si traza di Franza, et che se intendea el cardinal San Piero ad Vincula aver speso ducati 10 milia per ditta impresa di Saona, sperando che reusischa.
     
      Item, come lì a Milano era domino Philiberto borgognone orator cesareo, zonto di Roma mal contento di la liga verso il suo re, et el cardinal curzense, trovase ancor a Verzeli, havia scrito a uno suo a Modena voler andar a Maximiano e poi tornar a Roma se 'l porà. Et acciò non andasse in Franza, el ducha li havia mandà uno frate suo amico.
     
      Item, era zonto Nicolò de Nasin con la sua compagnia de stratioti, e Bernardin da Nona et Busichii con 50 stratioti. Questi ultimi erano a Ravena, et li primi a Brexa, et andavano verso Alexandria, et il ducha ringratiava di questo la Signoria, et li pareva dificile il darli la biava justa il solito.
     
      Item, come era zonto monsignor di Obignì ivi venuto da Roma, e dovea passar in Franza securo.
     
      Item, che 'l legato havia fato l'oficio funebre a la duchessa in Santa Maria di le Gratie, dove intervene li oratori e la corte.
     
      Item, per suplir 2500 fanti dimandati da Zenoa, e restava a spazar 500, qualli sariano presti, et li manderiano ut supra.
     
      Da Morbenga, di Zuam Piero Stella secretario nostro de 25, et de Yprest de 1.° de l'instante, el partir dil re Maximiano per Ispruch, e poi volea andar a la dieta de Lyndò.
     
      Item, che esso secretario, insieme col re, havea passà il monte di Nombrai a piedi, dove era grandissime neve.