Item, i oratori dil ducha di Ferara erano stà alditi a Bormio, i qualli aviano excusato il suo signor si non era venuto a far reverentia a soa majestà, per la malla indispositione di la persona, et erano stà expediti, et restava col re domino Pandolfo Fan uno de li oratori preditti.
     
      Item, che 'l re volea mandar instrutione a la dieta de Lyndò e convochar altre dyete a Alla. Et è da saper che feva redur ditte dyete per recuperar danari per pagar li panni tolti per vestir la sua corte, sì come molti de lì diceva.
     
      In questo consejo di pregadi, fo risposo a li oratori dil preditto re di la obligatione dil pagamento di sguizari per rata, che assende a la summa di 18 milia fiorini: che non essendo obligadi, et havendo tenuto zente et armata a la pisana impresa ultra el debito, non essendo stà conduti ditti [459] sguizari per sua majestà, tamen, per honor di quella, siamo contenti donarli fiorini 12 milia, videlicet ducati 9000, di quali 4000 se darà a la partita di li ditti soi oratori, el resto per Zorzi Pixani dotor et cavalier orator designato a soa majestà, se li manderà quando l'anderà.
     
      Item, fu preso che 'l colegio elezesse uno zenthilomo nostro che andasse a levar li 300 homeni d'arme deputati ad andar sul stado di Milan, zoè questi 5 condutieri: Alexandro Cojom, homeni d'arme 60; Tadio da la Motella, homeni d'arme 60; Taliam da Carpi, homeni d'arme 100; conte Alvixe Avogaro, homeni d'arme 60, i qualli erano in bresana. In tutto cavalli 1120, che sono homeni d'arme 380. Et ancora erano zà andati li stratioti et Zuam Griego con 50 cavali lizieri.