Et a dì 9 ditto, in collegio fo electo ductore et deputato a condur ditte zente Vincenzo Valier, era 40 criminal et alias stato pagador in campo, et nominato in la prima descriptione nostra di questa ystoria gallicha; el qual aceptoe, et a dì 11 da sera si partì, andò a Padoa, demum in brexana, come dirò.
     
      In questa terra, a dì 4 ditto, la note, morite domino Hironimo Lando patriarcha di Constantinopoli, el qual quivi habitava a Santo Antonin. El qual, avanti che 'l morisse, havia fatto un certo contracambio over renoncia al reverendissimo cardinal Grimani di ditto patriarchato; ma a Roma el pontifice quello dete al cardinal Michiel pur patricio nostro, come dirò di sotto, zoè lo titolo, perché per decreto novo fato in concistorio, altri cha(26) cardinali de caetero non pol haver tal titoli di patriarcha. Et ditto beneficio dà de intrada in l'isola di Crete, per caxon di ditto patriarchado, ducati 800: et cussì l'hebe.
     
      In questi giorni, con auctorità dil consejo di X con la zonta, fo decreto di vender per l'oficio di le cazude ducati ... milia di monte nuovo a duc. 75 el cento, et cussì fo venduto, et a furia trovono li danari, et ditti danari fono spesi senza metter decime.
     
      In questo tempo, a Veniexia et universalmente per tutta Italia, fo grandissima carestia di biave, adeo era gran penuria, et in fontego la farina di comun valleva lire 8 pic. 8 el ster. Et si non fusse stato la Cicilia, cussì dirò, trista Italia! perché quella dete formenti quasi a tutta Italia et la Barbaria, perhò che le trate dil Turcho erano serate.