Pur sopra di questo, la Signoria nostra, mediante li proveditori a le biave feno molte provisione, come dirò soto al loco suo. [460] Non voglio restar da scriver come madona Chiara di Gonzaga, sorela del marchexe di Mantoa et moglie fo di monsignor di Monpensier che morì a Baya in reame chiamato il conte dolfin, stata, da poi che 'l marito vene in Italia, sempre a Mantoa in compagnia con monsignor de Ligona, el qual al presente era andato in Franza, questa dona, volendo ritornar nel stato dil marito a governar li soi figlioli, il re di Franza li mandoe do oratori a tuorla, li qualli mandono a domandar salvo conduto al ducha de Milan et a la Signoria nostra, la qual cossa steteno qualche zorno a farla aciò non venisseno a explorar le cosse de Italia, pur a la fine li fo concesso ditto salvoconduto, come dirò di soto.
     
      [1497 01 09]A dì 9 ditto, nel consejo di pregadi, referite Antonio Grimani procurator di San Marcho la sua legatione di esser stato al re di romani insieme con Marco Antonio Morexini cavalier; et fo sì tarda perché da dì 27 octubrio in qua che 'l ritornò, per la egritudine sua longa, non era più usito di caxa. El qual referì, come, essendo stà mandato insieme col collega in li superior mexi al preditto re a Milan orator a consultar de agendis per la sua majestà post adventum in Italiam, come haveano disuaso el romper a Franza in Savoja e Monferà, et persuase la expeditione per via di Bergogna; et parse al re tuor quella contra fiorentini per mar a Liburno, inferendo haveano disuaso etc. perché il venir in Italia di sua majestà era stà zerchà da' nostri judicando oponer al re di Franza, qual, non venendo, dovea star reservado ad majora per honor di la liga.