L'armata da Napoli non era zonta, et che l'orator neapolitano havia promesso ducati 400 per la sua parte, per la spexa dil ruinar di le caxe di Saona.
     
      Da Milan, di 12 et 13, come era stà formato processo contra domino Joanne de Becharia consier dil ducha, per la intelligentia havea confessato haver con Zuan Jacomo Traulzi, et per questo il ducha havìa terminà cunfischar i beni dil Traulzi, come ogni raxon volea. Et il ducha molto sdegnato contra di Traulzi, et col arziepiscopo di Como di caxa di Traulzi et zerman di Zuan Jacomo et suo consier et fidelissimo habuit multa verba, dolendosi di Zuan Jacomo.
     
      Dal Stella secretario nostro, di 5 de l'instante in Yspruch, come ivi era zonto el ducha Federico de Saxonia et Zuane suo fratelo honorati dal re di romani. Et che l'havea electo orator in Ingiltera, et exortava el re don Fedrico fusse acetà in la liga, perché contentava la contribution di ducati 21 milia. Et alia scrisse non da conto.
     
      De Yspania, di Jacomo Contarini doctor orator nostro, date a Burgos a dì 5, 11, 13 dezembrio, tenute fin 17, come era stà fato cavalier in Portogallo con grandissima demostratione di amor dil re e regina e tutta la corte, quale il re volse cenzerli la spada et ponerli l'elmo in testa, et per altri cavalieri calzati li spironi. Poi esserli stà referito per l'Almazano secretario dil re, che, vedendo i regali li successi italici et indurato il re di Franza contra [470] la liga e non vegnir a pace, ma più presto indurato, come havea avisi da Perpignan, dove se trovava capitano monsignor di Santo Andrea francese.