Et il papa disse: "quando intenderemo el re non voler pace, semo contenti".
     
      Item, haveano da Lion il re atendea a caze e piaceri con la regina.
     
      Dal castelan di Todi, che domino Ludovico de Lactis zenthilomo de lì capo di parte amica de' Orsini e parente del signor Virginio, havea scazà la parte contraria; morti tre di principali; el resto di zenthilomeni erano reduti a uno monasterio. El castelan tamen, sperava mantenirsi per do over tre mexi. Dicto Lodovico era con cavali 300 e gran numero di partesani, e dovease conzonzer con Vitelozo per andar a Brazano, el qual Vitelozo partì di Cisterna con homeni d'arme 200, fatto la volta di Cità di Castelle, per conzonzerse con Carlo Orsino a Suriano, dove era Zuan Zordan Monopello con cavali 200. E per quanto se dicea, asenderiano a cavali 1500, fanti e partesani cercha 3000, e venirano a la volta di Roma per aver in la terra la parte, per la qual cossa, il pontifice facea portar in Castel Sancto Anzolo molte provisione etc. Ma il cardinal di Napoli, quel di Siena et Sanseverino tratavano acordo con dicti Orsini; prometevano al papa il stado fo dil signor Francescheto Cibo, fo fiul di papa Innocentio, a questo papa, et ducati 30 milia, et la caxa dil signor Virginio, che è a Roma in Campo de Fior, al cardinal Valenza fiol dil papa. Et tamen esso pontifice non voleva tal acordo, ma tuto il stato etc.
     
      Da Napoli, di 8 et 10 di San Germano, dil Capelo orator nostro, che 'l re atendea a la expedition contra il prefeto di Sora, el qual ben resisteva.