In questo zorno, a dì 19 ditto, nel consejo di pregadi, fo dato licentia a Domenego Dolfin proveditor nostro che, atento havesse dimandà licentia di repatriar, che potesse vegnir, et Zustignan Morexini suo collega dovesse romagnir, perché pur non volevano nostri abandonar l'impresa di Pisa, zoè mantenirla in libertà.
     
      Da Roma, di 16, come il pontifice ringratiava la Signoria di non haver dato licentia al conte di Pitigliano, havendola dimandata di andar in ajuto di soi Orsini; et pregò ser Nicolò Michiel orator nostro scrivesse de qui che la Signoria lo ajutasse, per esser provocato da Vitelozo Vitelli, per averli tolto Cisterna et Todi, et contra questo heretico et maligno Virginio Orsini; et voleva in le man Paulo Vitelli, per poter con quello deviar el fradelo de Orsini. El qual Paulo era prexon dil marchexe di Mantoa, et a Mantoa custodito.
     
      Dil campo di Brazano, come fo data la bataglia do volte in quel dì primo a dì 9, et a dì 15, et fo cruentissima, morti zercha homeni 100 e plui, feriti molti di l'exercito pontificio, et che zonzeano zente a Suriano al signor Carlo Orsini.
     
      Item, come era lettere da Turin dil zonzer lì a dì 6 zener, dil cardinal San Piero in Vincula, e dil passar di fanti 4000, et che 'l papa non atendeva ad altro cha a la ruina contra Orsini.
     
      Da Milan, di 14, tre lettere. Come l'orator fiorentino havia dito al ducha che Octaviano Fregoso non era stà lassato far fanti a Fiorenza per invader le Specie.
     
      Item, che a Turin era zonto da Casal el vescovo di Famagosta vicario dil Vincula, et monsignor de Serenon, et che havia ditto el signor Constantino Arniti esser ben disposto in le cosse de' francesi et [474] contentar di dar il passo quando il ducha di Savoia lo consejasse, et che dicto Constantin parea recusasse dar le terre, acciò, rompendo de lì, se difereva l'impresa di Zenoa.