Et che da Spino non se li potea obviar; ma de Novi era stà provisto per il conte di Cajazo, el qual havea tolto da la terra da 70 homeni di sospecto, e tajate le strade andava in rocha, messo in la terra fanti 400, [480] trato molte anime et mandate a star oltra la Scrivia, et havia opinion di brusar quel loco non potendo sostenir l'impeto hostile. Che la rocha, ben fusse Fregosa, erano ben disposti a Zenoa; che i nimici andavano mal pagati e di malavoja; che per penuria de danari non dureriano per esser fama che a Zenoa et Saona era stà provisto. Si continuava le provision verso Tortona, Alexandria e Novi; i nimici stavano sul disegno di tre loci di Monferà di alozar.
     
      Item, che 'l ducha dicea per l'obito di la duchessa era stà in camera; ma non volea perder il stato. Avea solicità Mirandola e Corezo con le fantarie per Zenoa e confin dil Piamonte.
     
      Item, che l'orator ferarese intrava in li consulti, et che 'l ducha havia dicto al legato scrivesse al pontifice lo aiutasse et si adatasse con Orsini, et era di opinion de restituir Pisa a' fiorentini, et pregò l'orator nostro scrivesse che li confini nostri fusse in hordine, et il conte di Petigliano. Et instava il passar di 300 homeni d'arme nostri per mandarli in tortonese.
     
      Item, aver scrito al conte di Cajazo si oppona ai conati hostili a Novi, perché, preoccupato quel passo, judicava esser levata la speranza ai nimici, et che quelli di Zenoa volea più fanti. Havia scrito al suo comisario non manchasse.
     
      Noto. Fo deliberà che Francesco Mocenigo capitano di Brexa andasse a Gedi dal conte di Petigliano governador di le zente nostre, et li dovesse dir el desse voce di meterse in hordine con le zente, et stia aparechiato ai confini, et si fazi noticia al ducha di Milano di questo.