Item, che havia dato al signor Galeoto da la Mirandola danari per 50 homeni d'arme, acciò andasse presto in campo. Et solicitava il tegnir di le nostre zente ad hordine a li confini, dicendo le sue non li basta, havendo a tenirle separate, et pocho era de fidarsi de' zenoesi per le parte tra lhoro grandissime.
     
      Da Napoli, di San German et Atino, di 14 fin 18, come il re atendea a la expedition dil contà di Sora di tre loci, et il capitano yspano don Consalvo Fernandes havia abuto Posta, preso e morti cavali 50 di quelli il prefeto mandava in dito loco di Posta, dove erano do nepoti di Gratiano di Guerra.
     
      Item, per la crudeltà di spagnoli, uno loco ditto Campli si havia reso. El signor Prospero Colona era contra Sora; havea abuto per forza el borgo de Arze con li alemani, et restavano forteze tre, zoè Sora, Vicalvi et Oliveto. In Sora el preffeto havia posto artelarie. Il re dovia tornar a Napoli. Havia opinion lassar le fantarie a ruinar la rocha, et che [483] don Consalvo havia opinion non andar al pontifice, et che 'l re si laudava di la deliberation di la Signoria in materia tarentina, se offerse sempre disposto al honor di quella. Don Ferando Consalves preditto dovea andar a la expugnatione de Oliveto. Sperava averlo per forza. El signor Prospero ab alio latere havea abuto Ponte Rocha, e volendose defender, havia tajato a pezi, per i populi obstinati per Franza.
     
      Item, el sopra dito Ferando havia abuto Oliveto con la citadela d'acordo, et sperava haver la rocha;
     
      Item, l'orator nostro Polo Capelo era a Atino mia 5 distante da Vicalvi, et il duca di Sora Vechio, con i fioli, era venuto al re, et il prefetto lui si difendeva.