Adoncha, questi quatro sarà 750 homeni d'arme, et 300 ne erano zà andati, come ho scripto di sopra, zoè domino Thadeo da la Motella, conte Alvise Avogaro, Taliano da Carpi et domino Alexandro Coglion fidelissimi condutieri nostri, ita che sarano di la Signoria nostra homeni d'arme 1000, che son cavali 4000, senza i stratioti et cavali lizieri. Et fo scripto a Francesco Mocenigo capitano di Brexa dovesse solicitar dicto conte di Petigliano ad andar subito, el qual conte volse tre page, et le fo date et si partì di Brexa acompagnato dal ditto capitano fino sora Ojo et fuora dil brexam, sì come dirò di soto. Et il conte Bernardin etiam, abuto danari, fo molto solicito, et ancora el conte Zuam Francesco di Gambara; ma Annibal Bentivoi non andò sì impressa. Oltra di questo, fo scripto al marchese di Mantoa capitano zeneral nostro si dovesse metter in hordine e star preparato per cavalchar bisognando, et a tutto il resto de li condutieri fu facto comandamento che dovesseno cavalchar in brexana a quelli confini di qua di Ojo con le lhoro condute, et li fo dato danari, et scrito a li rectori di le terre che dovesseno mandar ditte zente d'arme ut supra. Siché da ogni banda risonava guerra, et fo ordinato a Luca Pixani capitano di Verona dovesse andar a Mantoa a dir al prefato marchexe si mettesse in hordine, et cussì andoe. Ancora fo creati do provedadori generali in campo sopra le zente nostre sul teritorio de Milano, Andrea Zanchani, era stato cao dil consejo di X, et Nicolò Foscarini, electo capitano a Verona et figlio che fu di Alvise doctor et procurator di San Marco.