I qualli, la matina seguente, vedendo li urgenti bisogni di la republicha, libentissime ambedoi acceptono, et in quel zorno, licet fusse San Marco, fo chiamà gran consejo et messo parte, atento che 'l Foscarini andava in campo proveditor senza alcun salario, che li fusse riservà la capitaniaria di Verona fino al suo ritorno: et cussì fo preso. I qualli proveditori partino a dì 5 fevrer, come scriverò di sotto.
     
      I nimici veramente erano cavali 4000, zoè 700 in 800 lanze francese con il Traulzi, 200 cavali lizieri et 3000 fanti. Et era dicto exercito tripartito. Una parte con esso Traulzi sul stado de Milan; una verso Saona a l'Altar col cardinal San Piero in Vincula el qual, mediante le sue pratiche, credeva intrar in Saona; l'altra era con domino Baptistino Fregoso verso Novi etc. El ducha di Milano stava in castello, né ussiva di quello, et molto conferiva con Marco Dandolo doctor et cavalier orator nostro, et era pien di fastidio dubitando dil stato suo. El roy [495] di Franza era a Lion con la regina, et si divulgava deveva vegnir di qua da' monti. El ducha d'Orliens el si ritrovava a Lion. Et questo Zuan Jacomo di Traulzi havia qualche intendimento sul stado dil ducha de Milan per esser citadino de Milano et capo di parte gelfa, et suo fratello era a Milano consier dil ducha. È da saper che 'l ducha d'Orliens per nome chiamato Lodovico, se intitola ducha de Milano, et dice jure haereditario dicto duchato pervegnerli per linea dil ducha Filippo.
     
      A Zenoa le cosse erano in gran paura, et il governador et comissario ducal erano in Zenoa facendo provisione, et mandono fuor di la cità molte persone di la parte Fregosa, e dubitavano assai di novità maxime di Saona, dove era ito domino Joanne Adorno con bon numero de fanti et Lucio Malvezo.