Item, che la terra di Taranto, a dì 20 dil passato, si havia reso a don Cesaro et levato l'insegne aragonese, zoè uno zorno avanti che Zorzi Franco secretario nostro mandato con li syndici di quel luoco fusse ivi zonto. Restava la rocha, la qual era in man de' francesi, et pur etiam poi si rese, et [499] fono sedate quelle cosse, et il re don Fedrico have Taranto, non havendo la Signoria nostra voluto impazarsi. Di la qual cossa referiva uberrime gratie, et a' tarentini li perdonoe ogni rebelione etc. Restava Rocha Vielma a recuperar, dove era, come ho scripto di sopra, Gratiano di Guerra francese.
     
      Da Roma, come el pontifice, vedendo haver abuta tal strage, era contento di pratichar acordo con li Orsini. Et cussì si pratichava mediante li do cardinali Siena et Sanseverino, et quel Beneto da Sara.
     
      Da Pisa, come a uno loco chiamato Palaron de li marchexi Malaspina, volendo fiorentini darli la bataja, stratiotti et alcune altre zente nostre fono a le man, et rebatè li dicti fiorentini et rimaseno con victoria. A li qual marchexi fo dato per la Signoria nostra ducati 2000 perché se ajutasseno.
     
      Da Milan, come el ducha ringratiava molto la Signoria di le provision haveano preso di far per varentar il stato suo, et exortava fusseno preste. Et che di campo havia avisi inimici esser a Sace, et che non haveano molti danari, et era divulgato che Zuan Jacomo di Traulzi volleva lassar 200 de' soi fanti in ogni castello che haveano aquistato, et partirsi con le zente dal Bosco et andar al Altar a trovar el cardinal San Piero in Vincula.