Et a dì 28, al levar di la luna, dicte nostre galie si levò di Saona con gran vento per Zenoa.
     
      Item, come havia avisi inimici segnavano andar verso Seravale, i qualli erano al Bosco, et San Piero in Vincula dovea zonzer a Saona con 200 lanze et 600 cavali taliani e fantarie. In tutto sariano 4000 persone.
     
      Item, che havia da Pisa era zonto il barcharizo de orzi, et pur erano in gran necessità quella terra per vituarie, et a Portovenere era le 2 nostre galie, Marin Signolo candioto, et quella di Alexandro di Gotti corfuato.
     
      Lettera de 29. Come havia da Zenoa cargato su galie 13, zoè 7 nostre, 4 dil re don Fedrico et 2 zenoese dil Gobo, fanti 1600 et cavali 40 de homeni d'arme in barche, et a hore 23 cargono, et a hore 7 si partino remurchiando le barche, et a hora una di zorno arivono a Saona. I nimici, a hore 6 erano levati con fuga et andati verso l'Altar, castello di Monferà mia 7 lontano di Saona, et le zente nostre, zoè quelle erano in Saona, a mezo zorno li deteno driedo mia 2, et villani li dete ne le coaze, et preseno cariazi 7 et feceno alcuni presoni. Domino Baptistino era diseso in la Valle di la Stella con 6 cavali et 12 fanti per far voltar quella, come el dì avanti uno messo dil cardinal San Piero in Vincula havia facto; et dicto domino Baptistino, inteso la fuga dil campo di ditta Vale, si partì, et le zente nostre tornò in Saona a hore 23 1/2 e cussì le galie, le qual erano andate a Gue per far spale a le zente nostre preditte, zoè quelle ussiteno di Saona. Et come da alcuni frati inteseno, che haveano sepeliti lhoro de' inimici [502] amazati in la scaramuza et morti da le bombarde da 60 in suso.