El cardinal Vincula era a l'Altar, aspectava 200 cavali e le artelarie.
     
      Item, come era andato dal marchexe del Final uno comissario dil re di Franza per intender l'opinion sua, si voleva dar passo e vituarie al suo campo, el qual marchexe havia risposto, che per li castelli che teniva su el Dolfinà et su quel di Monferà prometeva non si moveria; ma che le zente di li castelli teniva sul zenoese le disponevano per el suo signor ducha de Milano et per la liga. Unde, dicto comissario li dimandò la forteza del Final per soa cautione et segurtà; et li rispose volea el cardinal San Piero in Vincula et domino Baptistino per ostasi. Adeo, dicto messo con tal risposta da lui si partite. Nostri era, zoè a custodia di Saona, tra nui e Milan pagati 3000 fanti et 40 homeni d'arme. Et li passi dil zenoese sono fortissimi, et con dificultà si poteva intrar. Inimici adoncha erano a l'Altar, et lì si stava con dicto cardinal Vincula.
     
      [1497 02 04]A dì 4 fevrer, nel consejo di pregadi, fo preso di armar 2 barze, zoè la barza nuova di botte ... et altra barza fo l'anno passato fuora col capitano di le nave; et sopra la barza dil capitano dovesse andar homeni 300, et su quella altra homeni 200. Et cussì fo decreto che Andrea Loredan, zà electo capitano di le nave armade, dovesse metter banco et partirsi subito insieme con l'altra barza, di la qual era patron electo Daniel Pasqualigo. Et cussì, dicto capitano, a dì 12 dicto, fo la prima domenega di Quaresema, messe banco, et la sua barza, da poi che fu conza a Poveja, ussite fuora, et cussì quella altra Pasqualiga.