I nimici erano, per quanto poi intese, a Ovach sora la valle di Ponzevera. Et par avesse lettere di la Signoria come la era contenta di pagar 4000 sguizari per mità con Milano, e per questo effecto haviano remesso ducati 3000 a Marco Dandolo doctor e cavalier orator nostro a Milano; et havia scripto a Pisa fosseno mandati li stratioti erano de lì in Lombardia, et fato cavalchar li altri su Ojo.
     
      Lettera di 4. Come era tornato con le galie a Zenoa, et a hore 2 di note, hessendo a Gue, fo una gran fortuna, adeo che la galia lisignana andò a traverso in terra. Li galioti dismontono. La qual galia, [506] ita volente Deo, andò sora l'alega, et stete cussì sino zorno, che si andava più in là, deva in terra per esser spiaza, et si rompeva. Et il zorno sequente, bonazata, non ebbe alcun danno.
     
      Item, come haveano abuto nove inimici haver abuto la rocha di Saliceto a pati, et che 'l Traulzi e domino Baptistino erano partiti di Ovach et andati al Bosco. A dì 5 le galie ritornò a Saona, et domino Joanne Adorno con uno bragantin andò al Dolfinà, et prima protestò al nostro proveditor non si partisse de lì etc.
     
      Da Verona, di Luca Pixani capitano. Come havia cavalchato, justa i comandamenti di la Signoria, a Mantoa, et che 'l marchexe diceva era mal in hordine di zente, et che in reame havia patito assai, et che era parato a cavalchar; tamen li bisognava dieci page a voler metter in hordine la sua compagnia. Ma è da saper li altri nostri condutieri quasi tutti cavalchono in brexana, zoè si messeno in hordine aspectando di cavalchar; ma non fu de bisogno, perhò non cavalcono.