Et post prandium, venuti li messi dil ducha a compagnarlo in castello, andoe insieme con l'orator nostro. Et il ducha il vene contra con uno mantello longo da coroto, et havia barba. Et fato le acoglientie, andati in camera, parlono molto insieme, poi andono dal [509] cardinal di Santa Croce legato apostolico alozato etiam in castello, et poi, il zorno seguente, fo a dì 11, partì di Milano acompagnato fuori da l'orator nostro, et a dì 12 zonse in Alexandria, come dirò di soto.
     
      Di Alexandria, vene lettere di 11, come in quel zorno, a hore 24, era venuto uno messo notificando come erano zonti li fanti dil cardinal San Piero ad Vincula in campo di Traulzi a Sice, dove erano reduti havendo lassato la impresa di Saona. Et cussì tute le zente se reducevano a uno, et il Traulzi alozoe dicti fanti a uno castello chiamato Spino presso a Sice uno miglio. Et che inimici se ingrossavano, et che nostri dubitavano per questo ingrossar che non andasseno al Castelazo, et stevano con paura, et per questo el signor Galeazo fece provisione che in quella note mandoe uno chiamato Badino suo capitano con 400 fanti, et ancora gli mandoe homeni d'arme 100, oltra quelli che erano in dicto Castelazo. Etiam mandoe el conte Lodovico da la Mirandola a far provisione che fusse butato zoso le caxe che erano di fuora de li borgi di dicto loco de Castelazo, et ordinato tute le artilarie per difendere, e che tute le zente d'arme erano in Alexandria, che il zorno seguente fusseno in hordine et armate a li soi alozamenti, acciò se inimici veniseno per dar fastidio a dicto Castelazo, li poteseno obviar et disturbarli.