Et che contra di dicto conte governador zeneral di le zente di la Signoria nostra et dil conte Bernardin Fortebrazo, era andato fuor di Milano el signor ducha con li oratori, et per alegreza si tagliò la barba che portava per la morte di la moglie sua. Et dicto conte fue molto honorato et carezato. Alozò in la caxa dil conte di Cajazo, et il Foscarini proveditor alozò sopra la piaza dil Castello in la caxa fo dil signor Ruberto di Sanseverino. Et stato in coloquio col ducha, a dì ... ditto si partì esso conte de Milano, et andoe verso Alexandria, dove era aspectato con desiderio. Et la sua venuta fu di gran contento al ducha el qual molto ringratiava la Signoria nostra, et di non pocho terror a li inimici, come dirò di sotto.
     
      [513] Lettera dil conte. Alvixe Avogaro al capitano di Brexa, data in Alexandria a dì 12 ditto. Come essendo avisati, i nimici dovea andar a dar la bataglia al Castelazo. Et a hore 3 di zorno si presentò do bataglie al dicto loco, una di fanti zercha 2000 con le artilarie, e un'altra di zente d'arme, zoè homeni d'arme 300, in una certa bassa dove core una aqua che l'artelaria nostra dil Castelazo non li potea nuoser; poi do altre bataglie pur di zente d'arme, e una di fantarie e l'altra di cavali lizieri a uno loco dicto Cassina, mezo mio dal Castelazo. Et nostri, che erano in Alexandria, ussiteno fuori con tutte le zente, 700 homeni d'arme, cavali lizieri 100; et ussiti per uno mio vicino al castello, una squadra de alemani numero 120 andò driedo a li cavali lizieri, et quelli dil Castelazo doveano ussir et scaramuzar, et li nostri poi darli driedo di homeni d'arme 200, 300 cavali lizieri et fanti 3000.