200 de staria al mese, fino che le anderiano al suo viazo. Et cussì stavano.
     
      Da Zenoa, vene lettere dil proveditor di l'armada de 20. Come havia recevuto una lettera de 19 da Pisa de Domenego Dolfin, Zustignan Morexini proveditori et Francesco da la Zudecha secretario, che advisava come haveano da Piombino, per lettere di Marioto Lanfranchi mercadante pisano era venuto di Cicilia con la nave nostra patron Zaneto da Muran, la qual era di Stefano e Theodosio Contarini, come a dì 17 di l'instante a mezo zorno si apresentò 5 barze francese, et per esser la dita nave in spiaza, li andò adosso, et quella tolse et menò via. La qual era carga de formenti di rason di la Signoria nostra fatti per conto di Benedetto Zustignan patricio nostro, zercha stera 8 milia, la qual, da dì 7 dicto, era ivi a ferro, et non havia ancora discargato li formenti, di li qual a Pisa ne era grandissima inopia. Item, le dite barze havia etiam preso 2 altre nave zenoese era in conserva di la ditta nave, et però dimandavano essi proveditori ajuto, et che fusse fato provision de grani per Pisa, altramente quella terra non era possibile potesse durar, perché erano de vituarie in extremis; et che, per più lhoro danno, le nostre 2 galie state a Portovenere li haveano conzi, perché haveano pisani convenuto passer dicti galioti, che per la povera terra non haveano, et che bona parte de' dicti galioti erano fuziti. Or Domenico Malipiero proveditor di l'armada, inteso questo, prima mandò la galia zaratina a Pisa con panaticha, poi fece valide provisione e nolizoe 3 barze et cargò 1500 stera di grani tolti lì a Zenoa, et etiam altri formenti, et mandò subito a Portovenere per subsidio di quella terra di Pisa.