Di campo de Alexandria de 21. Come a dì 20 da sera era ivi zonto Andrea Zanchani proveditor nostro. Che inimici erano pur alozati propinquo a Aste per paura de' nostri, et che nostri volevano atender a recuperar li castelli persi, li qualli, da Bosco in fuora, tutti si reaveriano; et a questo atendevano.
     
      Lettera di 22, di Zuam Paulo Gradenigo. Come havia in quel zorno al Castelazo fato la mostra di stratioti. Erano numero 450, et li fo dato la paga ducati tre per uno. Et poi, a dì 23, esso proveditor andò in Alexandria per conferir con li altri, et etiam Frachasso andò a star in Alexandria per non bisognar più star al Castelazo. Solum il Gradenigo sopra nominato restoe con li stratioti, e Zuam Griego con li ballestrieri e alcuni alemani e borgognoni.
     
      Lettera di 22 di li proveditori nostri de Alexandria. Come haveano terminato che la matina seguente el conte di Cajazo, con li soi 130 homeni d'arme et balestrieri 50, insieme con domino Joanne Adorno et domino Joanne Alovisio del Fiesco, con i soi provisionati che sono 2600, e homeni d'arme 25, andaseno a la impresa del castel de Novi et Ovach; ma perché el loco de Ovach è più debile et più a preposito di le cosse di Zenoa et di Saona, fu deliberato de principiar da quello.
     
      Item, come haveano per diverse vie, come el Traulzi dava danari a le fanterie, con intention di andar a uno loco de importantia. Tamen, nostri judichavano volesseno ritornar a la volta di Saona più grossi che l'altra fiata, insieme con San Piero in Vincula, quale si ritrovava in dicto loco di Aste.