La qual cossa fo molto bona per la povera zente. Et Zacharia Dolfin compite con li compagni proveditori a le biave, in loco di li qual fono electi Francesco Bragadin, Andrea Minoto et Zuam Batista Foscarini, et questi etiam non restavano di far provisione acciò fusse assà formenti in la terra. Et è da saper chome alcuni spagniuli erano habitanti, in questa terra, zoè Zuam Zanze et Rafael Besalu, feno una vendeda a la Signoria di stera 50 milia formenti di Sicilia prometendo darli per tutto mazo, et ebbeno, oltra li danari il dono, perché, questo decembrio passato fo fato uno editto, che chi conduceva formenti in questa terra per tutto mazo havesse di dono s. 25 dil ster, di danari di la Signoria nostra. Et ditta compreda fo a raxon di l. 7 et s. 10 el ster, et tamen el si vendeva poi assà mancho.
     
      Da Milano, come haveano di Savoia dil zonzer de lì, a dì 24 fevrer, Marco Zorzi orator nostro et honorato assai da quel ducha Philippo, el qual havia le gotte et perhò non li era andato contra, ma mandò suo fiol el principe di anni 20. Et poi li dete audientia, et dimostrava, amar assai la Signoria nostra, et voler esser bon italiano, licet fusse barba dil re di Franza. Dove era do oratori francesi, zoè monsignor de Pienes et el prior di Alvernia, i qualli [536] ritornono in Franza de lì a pochi zorni. Ancora era, per nome dil pontifice, uno chiamato Boadiglia, et per Milano Mafio de Pirola. Ma ancora non era lettere di esso Marco Zorzi in la Signoria di suo zonzer, et fo judichato fusseno stà retenute, perché, zonto che 'l fu de lì, è da judichar el scrivesse.