Apresso a li altri, se li manda 150 homeni d'arme nostri, tra li qual esso Thadio da la Motella era stà electo per uno con la sua compagnia di homeni d'arme 60, et si dovea partir per andar al Bosco et alozar poi a Seraval. Et in quel zorno havia fatto la mostra di la sua compagnia.
     
      Item, credeva tutte le zente si fariano inanzi, facendo il forzo per recuperar Novi et Ova.
     
      Da Zenoa, dal proveditor Malipiero di 7, 8 et 9. Chome havia ricevuto lettere di la Signoria che li cometeva dovesse confortar quel governador di Zenoa, et cussì havia facto.
     
      Item, per avisi haveano, che le nave nostre prese da' francesi erano stà menate a Marseja o a Tolon per non haverli voluto dar salvo conduto el ducha di Savoia in la Provenza.
     
      Item, come haveano da Pisa lettere esser gran carestia.
     
      Item, come, a dì 6, era zonto de lì misier Anz con alemani 1200, i qual subito fono drezati per terra verso Saona. Et che era de lì li tempi contrarii a navicar; pur le 2 galie di Brizio Zustignan, armate per il ducha di Milan, in quel zorno 6 marzo erano andate a Saona con Lucio Malvezo, et con malissimo tempo.
     
      Item, che i nemici erano in Novi et Ova intendevano esser partiti, et andati a unirse con li altri vano a Saona.
     
      [554] Item, che il zorno avanti, il conte de Trivento si voleva partir si 'l tempo fusse stà buono, el qual havia 12 barze, la menor di botte 500, le altre fin 1200, et 2 caravele. Di coloquii fati zercha l'armada da sir fata, et che 'l conte era zà montato su la barza per partirse e non volea più aspetar che si armasse nave; ma diceva di andar a Niza et a le ixole di Ares, poi in Catelogna, per asegurar le galie nostre di Barbaria dove era etiam 3 galie di Villamarin, siché certissime el vol andar in Catelogna.