[1497 03 16]Et a dì 16, vene la certeza di la trieva per lettere di 9 de l'instante da Turin di Marco Zorzi orator. Et mandò la copia di capitoli, li qualli sarano più avanti scripti. Et visto nostri erano in assà bona forma, fono alquanto di bon animo, et mandò a suspender il far di fanti et cavalchar di le zente.
     
      Di campo, lettera di Vizenzo Valier data a dì 11 in Alexandria. Come il zorno avanti se partì de lì el signor Galeazo per andar a Novi et Ova, con homeni d'arme 350, deli quali era, de' nostri, homeni d'arme n.° 60, zoè di domino Taliano da Carpi 30, dil conte Alvise Avogaro 15, et di domino Alexandro Cojon 15, e 'l resto dil ducha de Milano; fantarie, de alemani 1200, italiani 700, li quali erano ben in hordine di artellarie. Et da Milan era stà mandato in campo 2 boche grosse, et etiam per questa impresa de Novi boche 8 over 10 de spingarde e falconeti. Unde, judichavano dicto loco de Novi et Ova se renderia subito: questo, perché le gente inimiche erano dentro sono andate via, l'altra perché nostri andaveno meglio in hordine che non andorono l'altra volta.
     
      Item, che etiam eri era partito de lì cavali alemani 250 per non averse acordà dil suo pagamento; et ritornono a caxa soa, perché lhoro volevano esser pagati ogni 15 zorni.
     
      Item, come era stà facto la mostra di le gente d'arme nostre, zoè di le compagnie di domino [558] Thadio da la Motella, Alexandro Cojon, conte Alvise Avogaro, i qualli erano ben in hordine, et che in quel zorno de 11 era stà facto la mostra de molti cavali de' stratioti, et che Zuam Paulo Gradenigo lhoro proveditore si lamentava che erano inobedienti.