La terra tende al longo et è assà bel castello; varda per longo verso mezodì, et cussì la dita vale varda mezodì. Et ditto castello de Spin è lontan di la marina di zenoesi zercha 20 mia. Quelli di la rocha feva segni di fumo a li nimici dimandando soccorso, et vicino tenivano [564] alcuni casteleti, maxime Montebaldo al pè di la montagna, unde nostri messe 100 fanti a la guardia, i qualli stavano su una strada per far la via sicura a li nostri andavano a Spin, el qual castelo teniva le porte serade. Or inteso Frachasso, che era ussito fuora di la terra, che francesi si calava zo di la montagna, mandoe a dir al signor Galeazo che subito montasse a cavalo con le zente e balestrieri, e vegnisse fuora di la terra e facesse cargar li cariazi e li mandasse via perché li francesi discendevano zoso di la montagna molto grossi per socorer la ditta rocha, né era da star ad aspectarli perché erano da 3 in 4000 persone, tra i qual cavali 500 in 600. Et cussì el signor Galeazo, subito, senza dar altro aviso al proveditor di stratioti, montoe a cavalo facendo cargar loro cariazi, et fece sonar la trombeta atorno la terra che tutti montasse a cavallo e cavalchasse. E cussì fo fato; ma el proveditor preditto, meravegliandosi, mandò il suo canzelier a intender la causa, et visto questo et che la brigata coreva chi in qua chi in là, si armoe subito, et fato recargar li soi cariazi che in quella hora erano zonti, et montato a cavalo con li stratioti et andato fuori di la porta. In questo mezo, la terra, ritrovandosi vacua di soldati, in mancho di meza hora fo svudata, et non si vedea se non pochi di la terra, et le done lacrimante e dolente agravandose de esser abandonate da' nostri; dolendosi aver acetato nostri e a hora partirsi; et che venendo francesi li amazeriano tutti.