Et che la caravela havia suso homeni 200, et il galion homeni 300 tutti electi, disposti e ben in hordine, et con lhoro era quatro brigantini, et haveano deliberato tuor il ditto grano. Et avixadi da' nostri, che erano galie 5, li veneno contra con gran vigoria, et ancora nostri non era presentadi a la Foze, et ciascuna galia remorchiava 8, 9 et 10 barche per una, in tutto era barche 54. Et il proveditor ordinò le fusse lassate andar a terra verso le Foze, che già necessariamente se vedea incalzare dal galion e caravela, et esserli forzo, per salvarle, impedir li nimici con asalto di bataglia. Et perché erano dai nostri soprani ditti inimici, le galie se tirò a remi al vento, et subito veteno la Foze et le vele 54 che voltava indrio de noi a mar, perché li 4 brigantini le comenzava a incalzare. Unde, a do parte fo di bisogno al proveditor provedesse, con tanta necessità quanto la cità de Pisa importava et l'honor di la Signoria nostra. Et socorse le dicte barche de la galia soracomito domino Laurentio Loredano, et le altre galie andono con vigoria vedendo l'incalzo dete ditto proveditor al galion. Et esso soracomito lisignan li era apresso, et cussì investiteno con gran bataglia ditto galion et caravela, et molti de' nostri forono de lanza, de partesane, saxi de extrema grandeza veniva di la cheba e de li castelli malmenati. Adeo, nostri steteno molto mal fino che 'l spalatin vene per prova dil proveditor, et il zaratin per pope, et etiam lhoro investireno. Et in questo mezo, le barche introno in la Foze salve, et durò la bataglia hore 4 grosse, senza possa de' nostri, né de' nimici.