Lettera di Vicenzo Valier, data a dì soprascrito in Felizano. Come, hessendo in quel zorno andato el signor Galeazo con le zente sopraditte e tutti li stratioti a dar bataglia a Montealto, loco di astesana, havendoli prima fato intender per uno trombeta che se voleseno render altramente che sariano abrusati, non volseno far nulla. Et nostri piantorono tre boche di artelarie pizole, e butorono uno pezo dil reparo di tavole, perché la terra non n'è altro che riparo di tavole, dapoi derono la bataglia da do canti e introrono dentro. Et fo feriti de' inimici da 50 in 60, de li nostri 10 fin 15. El resto di lhoro se retirono in driedo, et andono in la rocha ch'è assà forte. La terra fo brusata et il forzo di le case disfate, perché di Aste non venisse soccorso alcuno. Et fuor di Montegrosso ussite forsi 25 cavali, quali forono da' nostri maltratati e feriti la mazor parte, e se ritraseno indriedo.
     
      Item, come in la Torre dil Quarto era 8 alemani, i qual, venendo zercha 6000 francesi di Aste con tre boche di artellarie, e trato doy colpi, si reseno. Et è dicto che Zuam Griego con li soi ballestrieri li pizegò parechii di lhoro francesi, et dicono esser morto uno homo da conto.
     
      Lettera di Zuam Paulo Gradenigo provedador di stratioti, data a dì 6 a Corniente, che narra di questo Montealto etc. Eri da matina cavalchò esso proveditor con li stratioti a Felizano, dove si havea ordine con el signor Galeazo di far una grossa cavalchata. E cussì adviati con el Bentivoy, con la sua compagnia passono il fiume Tanar lì a Felizano, dove era stà facto uno ponte, et andono verso Montegrosso et Montealto, lochi de' inimici su quel di Aste.