5.° Item, convenerunt et concluserunt: quod si praeteritis diebus, videlicet 5ª marcii et 25a aprilis, posita fuerit obsidio alicui civitati, villae, castello aut terrae per dictum regem Franciae, aut per suas gentes, aut suorum confoederatorum, et subditos, terras et dominia dictorum regis et reginae Hyspaniae aut suorum confoederatorum, et si obsidio fuerit posita terris aut dominiis dicti regis Franciae aut suorum confoederatorum per dictos regem et reginam Hyspaniae aut per eorum gentes et confoederatos, quod dicta obsidio debeat levari et removeatur, etiam si fuerint in compositione aut quovis modo, post dies suprascriptos, ideo concordatum et conclusum est, quod in locis qui fuerint in pacto aut compositione, quamvis removerint se ab illa obsidione, quod pactum et compositio in qua fuerint suspendatur, et remaneat in eodem statu quo erant primo in principio dictae treguae, usquequo dicta tregua finem coeperit, sive expiraverit.
      6.° Item, est concordatum: quod si post tempus dictarum induciarum, aliquis aut aliqui confoederatorum dicti regis Franciae acciperent aliquam vel aliquas terras, loca et fortilitia dictorum regis et reginae Hyspaniae, aut confoederatorum et adhaerentium; aut si aliquis ex confoederatis dictorum regis et reginae Hyspaniae acciperent aliquam vel aliquas civitates, loca et fortilitia dicti regis Franciae aut aliorum confoederatorum et adhaerentium, quod ille qui acceperit restituere debeat illis cuius fuerit. Quae omnia rex et regina Hyspaniae et dictus rex Franciae observare et adimplere faciant, et si confederati, quibus expectaret executio, non exequerentur, quod eodem casu habeantur pro fractoribus treguae, et quod intelligantur extra eam esse.