Item, che quelli che ritornerano ai lhor beni per virtù de questa pace, non serano loro né le sue heredità reputati per caduci per li censi durante el tempo de la guerra, ma serano tenuti descargar et aquietar quelli che haverano galduto dite heredità per ricompensa. Et se le dite heredità serano per le guerre ruinate et senza cultura, color ai qual le apartignerano serano discargadi per diti rendidi per el tempo che non serà lavorà le terre, et fin el zorno de questa pace.
     
      Item, che 'l non serà fato, over dato, a li beni, fruti et intrade che li subditi hano, haverano nel paexe et signorie de l'altra parte; né similiter ai corpi over presoni dei diti subditi, in loro bene e mercadantie che serano condute da una parte a l'altra algun aresto over impedimento, soto umbra de altre represi, aresti over impedimenti de altri beni che se dicese esser fate sotto i subditi de l'altra parte i lor beni e mercadantie per cose condute durante le guerre nel tempo passato, o che de qui avanti porano venir se 'l non fusse per li proprii contrati fati, debiti e obligation de quello over de quelli che vorano impedir over arestar li diti fruti, danari e mercadantie, non se darano per i principi [599] over loro cancelieri alguna lettera de represaja, merchà o contra merchà o altre provisione per far contra el dito articulo, algun aresto over impedimento de le persone de li subditi de ciaschaduna parte.
     
      Item, che per questa pace i nobeli, citadini, servitori e officiali del re, mercadanti de la nation de Franza et altri de che condition se sia che siano partidi da la terra de Rens e da le vile dapoi la represa de quella, in qualche luogo o parte che i diti abscenti se siano retirati, potrano, ogni volta che li piacerà, retornar ne le lhoro habitation et mercadantia in la dita terra et cità, senza che alguno li possino incargar de cosse fate per el tempo passato dependente da dite guerre, né da sumissione over promesse che havesseno fato de non partir da le dite terre o de ritornar infra certo tempo sub confiscatione bonorum suorum, o altre pene che sono o sarano reputate nulle.