Et se i ditti absenti non vorano ritornar a star ne le dite terre e cità, (non) potrano esser constreti, sotto color de dite promesse, et tamen potrano conversar, come mercadanti et altramente in la dita terra et cità et in ciaschaduna de le dite parte. Et se i ditti absenti ritornerano a le lor prime residentie, over che starano fuora in una de le parte che li parerà, galderano in tute cosse del beneficio de questa pace, et haverano de presente, como li altri subditi de ciaschaduna parte, prompta, pacificha et integra possession de li lor beneficij, heredità rendedi et altri beni mobili et altra supelectile che ancora sia in rerum natura, salvo in le loro case quelli che le occupano o altri possino cossa veruna prender, demolir né transportar.
     
      Et similiter, li ecclesiastici, nobili, citadini e tuti altri che solevano far residentia in la terra de Sant Omer nel tempo che la dita terra era neutral, et che dapoi a l'occasion de le devision et de le prese et represe de quella sono absentadi, alguni contra lor volontà, alguni per loro neccessità, et tamen li è stà interdita la intrata et del venir in quella come facevano durante la dita neutralità, è stà deliberato che tute le zente de chiesia, nobili, citadini, stanti et habitanti et similiter abscenti et retirati in qualunche luogo se sia, serano reintegrati et remesi prontamente in la posession dei lhoro beneficii, case, rendede e posession che i havevano nel tempo che la cità era in neutralità. Loro potrano viver et star nel paexe come li altri habitanti de dita terra, et come facevano el tempo pasato, non obstante ogni interdito né altre cosse in contrario, le qual per el ben de la pace sia anulate insieme con tute le offese et injurie che diti habitanti l'uno verso l'altro, per [600] causa de querele s'erano promesse perdonare, né de quelle se posa alguna cosa dimandar over querelar, imo tuto sia reputato per non fato.