La qual astinentia de guerra, abia a durar per fino che parerà ad una parte et a l'altra, con tempo de 3 dì di contrabando dapoi che sarà notificado al prefato illustrissimo ducha di Savoia, e con condition che non abia a prejudichar a le sopradicte triegue. E cussì se comanda a tutti li capetanii e condutieri, squadrieri e altra zente da cavalo et da piedi, de qualunque stato e condition se voiano esser e siano con la preffata Signoria de Venecia et signor ducha de Milano, siano dove se vogliano in queste frontiere, che non hosino né presumano far ofension alcuna, per reto o indireto, verso le ditte zente di la majestà del re di Franza et ne le terre e subditi di Aste, sotto pena de la forcha durante dicta astinentia de guerra. Et per evitar le custion e scandoli che potesse ocorere tra le zente da una parte e l'altra, se comanda, [609] sotto la medesima pena a le zente, che alguna non prosuma de pratichar con le zente francese né andar in li luogi de Aste, salvo queli sarano deputati, o chi sarà conzeso licentia in scritura da li prefatti signori capetanei e provedadori, e ognium se vardi de la mala ventura. Et viva San Zorzi!
     
      Adoncha, essendo stà in campo et in Aste levato le offese, tutti stevano sopra li soi termeni. Tamen non pratichavano insieme, né nostri andava in Aste, ni francesi se impazava con nostri, aspectando il zorno 25 di april. Et havendo deliberato la Signoria nostra, con il ducha de Milano et il pontifice et re di romani come collegati de intrar in la ditta triegua fatta tra Franza e Spagna, scrisseno in campo la lhoro opinione.