Dil mexe di mazo 1497.
     
      [1497 05 01]A dì primo mazo, la Signoria consentì al ambasador dil signor di Rimano stera 18 milia di formento a l. 7 s. 10 el ster, che potesse trar di questa terra di quelli venuti di rason di la Signoria, perhoché a Rimano morivano da fame. Et ancora a' padoani fo lassato trar stera ... milia, perché quella terra etiam pativa sinestro, et zà un zorno su la piaza non ne era pan, cossa assà di memoria degna. Tamen, Polo Barbo podestà fece bona provisione etc.
     
      [1497 05 04]A dì 4 mazo, el zorno di la Sensa, la matina, andato el principe col Bucintoro a sposar il mar justa il consueto, essendo li stratioti a Lio, volseno far la mostra et corer la lanza mostrando la velocità e gagliardeza lhoro. Et acadete una gran disgratia: che havendo corso tutti, et uno di capi volendo corer chiamato Zorzi Mallacassa et scavazar la lanza in terra, il cavallo cadete, et si vene a dar de una schieza di la lanza in la testa, et de lì do zorni morite. El qual era valentissimo et exercitato a' servicii di la Signoria più fiate. Era de Napoli di Romania, et havia 10 ducati al mexe di provisione, la qual fo data al fiol, et fu portato a sepelir a la grecha a San Biasio, acompagnato dal suo cavalo e da la lanza et capelo fino a la sepultura, dove, a la grecha, li fo facto pianto et honorato assai.
     
      [1497 05 01]A dì primo ditto, vene in questa terra el marchexe Cabriel Malaspina de Fosdenovo, et andato a [615] la Signoria, expose alcune cosse. El qual, per ajuto datoli da' nostri, havia tenuto dominato e domina li soi castelli apresso Serzana a' confini de fiorentini, (num.