Donde, a hore circha 20, vene per nome de la serenissima rezina alcuni cavaglieri a levarne de casa nui oratori qui, videlicet quel del serenissimo re de' romani, Napoli, me et quel de Milano, et ne acompagnò fuori de la terra. Da la quale ussiti per spacio de miglia do, incontrassemo primum el conte di Benalcazar, quel de Salines, quel de Nieva, de Sifuentes, de Sirvola, de Miranda, et el visconte de Viguerna, deinde el marchexe de Moglia et quel de Vigliena, tertio el ducha de Alva, el ducha de Albucherche, lo admirante de Castiglia, et el gran contestabele, con el comandador mazor de l'hordine de San Jacomo, et el delentado de Murtia et li do infanti de Granata, ultimo el serenissimo re a paro con la antedicta illustrissima sposa, vestita molto richamente in habito quasi a la francese, con molte zoie de non picol valuta, a la quale seguiva cercha diexe de le sue damiselle, et alcuni signori venuti in sua compagnia, dei principali, per quanto se intende, de la ducea de Bergogna. Et apropinquandose ad epsa, fato prima la debita riverentia a la majestà regia, se congratulassemo con lei per nome di signori nostri de la venuta sua, con quelle parole ne parse ricerchar el presente officio. Et poi posti tuti al suo loco, doi videlicet a dextris et doi a sinistris de sua alteza, se aviassemo a un monasterio de monache molto devotissimo, pur fuori de la terra, chiamato Las Olgas, dove la mazor parte d'epse sono fiole de signori et gran maestri. Et entrati ne la ecclesia, se stete per spacio de hore do in coloquio con quelle sanctissime donne, che la illustrissima principessa monstrò receverne gran contento et satisfacione.