Et dicta parte have de sì ballote 1524, de no 35, et non sinciere 10. Et li fo fato il privilegio bollato con bolla d'oro. È da saper che dicto suo ambasador, che era prete, vene in questa terra per molte cosse, et andava con la Signoria, et fo el zorno di la Sensa a sposar il mar, et a disnar con el principe al loco suo di sotto di l'orator dil ducha di Ferara. Et tra le altre cosse che vene a dimandar, volse esser in bona amicitia et aderirsi a questa Signoria, et posto nel numero di aderenti.
     
      A Ravena, acadete certa novità di danni fono facti per feraresi a quelli confini, unde Cristoforo Moro podestà et capitano di Ravena vi mandoe alcuni stratioti verso Lugo. Et quelli di Lugo, venuti fuora perché prima esso podestà havea mandato a tuor li cari et animali, feva danno sul territorio nostro, et fono a le man, et ne fo morti alcuni. Tandem, non sequite altro, et fo conze con lettere le cosse.
     
      Da Roma. El ducha di Urbino, havendo pagato li ducati 30 milia a' Orsini, si partì di Roma et vene ai soi castelli et Augubio da la moglie, con gran jubilo dil suo populo.
     
      Vene in questa terra in questi giorni el vescovo di Monopoli, el qual dimandava la Signoria volesse lassarli le sue intrade scuoder, et posieder quel vescovado, perhoché, per esser stà nimicho a caxa Aragona, la Signoria scrisse a Alvixe Loredam proveditor nostro de lì che facesse scoder ditte intrade [626] et tenir ben conto. Come sarà expedito, scriverò.
     
      Ancora vene oratori di Monopoli et Pulignano. Dimandavano immunità, oltra quello li era stà promesso, et che la Signoria li facesse che non pagaseno lhoro creditori zudei e marani fino ad anni 6. La qual cossa era molto ingiusta a rechieder a un justo dominio.