Item, al signor prefetto suo fratello, lo restituisse nel titolo di preffeto di Roma, et oltra il duchato di Sora che tien, etiam li dano, con voler dil serenissimo re don Fedrico di Napoli, col qual etiam si acordoe et li rese alcuni lochi che in reame teniva, or li dano alcuni castelli propinqui a Sinigaja che fo dil marchexe di Peschara, li quali sarano notadi qui in margine (?). Et quanto a li ducati 40 milia che esso preffeto tolse da l'orator dil Turcho che li portava a esso papa, rimaseno che esso cardinal San [643] Piero in Vincula, fusse lui judice, et in lui si remeteva tal cossa. Siché, certissimo questo acordo seguite, et fono sigilati li capitoli. Et la causa di tal adatamento fo il cardinal de Lisbona amicissimo dil Vincula. Et fo divulgato che ditto cardinal San Piero in Vincula doveva vegnir in Italia et vegnir ad star a Padoa, et etiam doveva vegnir in questa terra. Quello di lui sequite, sarà scripto di sotto. È ancor in Franza, et de lì adata le cosse sue, et tal acordo fece di volontà dil re di Franza, come da molti de ingegno questo fo tenuto.
     
      [1497 06 04]A dì 4 ditto, si partì di questa terra Andrea Trivixam andava orator nostro al re de Ingilterra. Andoe a Treviso, demum a Seravale, poi verso l'Alemagna cavalchoe. Et li fo fato per il consejo di pregadi la sua comissione, et mandata justa il consueto.
     
      In questo tempo, hessendo alcune barze francese in Cicilia le qual danizavano assai, et per più vie se intendevano de navilii presi de formenti et altre nave, maxime una de zenoesi come ho scripto di sopra, licet fusse la trieva; et a Zenoa havendo deliberato di far armata, rechiese la Signoria nostra a intrar per quinto, et contribuir a la spesa, come ho scripto in altro mexe di maxo.