Unde, fo consigliato tal materia tra li padri, et col conseglio di pregadi a dì ditto scrito a Zenoa a Zorzi Negro come erano contenti di partecipar a la spesa nel quinto, et li fo mandato li danari.
     
      Item, fo scrito a Domenego Malipiero proveditor di l'armada, era ivi in porto di Zenoa con 6 galie, che dovesse partirsi et vegnir a Corfù, non hessendo più bisogno in quella Riviera. Le qual galie, dirò cussì, fo quelle che in bona parte varentò Zenoa a star constante con la liga.
     
      Da Cataro, terra di la Signoria nostra in la Dalmatia vicina ad alcuni lochi del Turcho, per lettere di Piero Lion retor e provedador nostro, come ivi era venuti alcuni turchi a quelle marine vicino a Cataro, con uno flambular et certi sanzachi. I quali erano venuti a tuor il possesso de li lochi fo dil conte Zorzi Zernovich nominato di sopra, et che havia tolto bona parte de Zupa la qual era di la juridition di la Signoria nostra, licet per il conte Zorzi preditto alias fusse dominata. Siché, in quelli lochi era qualche pericolo di novità de essi turchi, perché haveano corso propinquo a Cataro et fatto qualche danno. Per la qual cossa, venitiani erano in qualche dubito che non fusse principio di romper guerra col Turcho. Unde, scrisseno al capitano zeneral che era a Corfù, che dovesse retenir tutti i navilii li capitava de formenti et mandarli a Cataro.
     
      [644] Item, fo scrito a Zenoa a Domenego Malipiero, el qual havia abuto licentia di levarse, che visis litteris, dovesse vegnir di longo, senza andar a Corfù, a Cataro con le 6 galie; et scripto al retor di Cataro et a Francesco Zigogna, che zà era partito et si judichava havesse fato la intrata in Cataro, che andava successor di Piero Lion, che con ogni dexterità vedesse de aquietar quelle cosse, et dar aviso dil tutto a la Signoria, perché la terra di Cataro è fortissima, et hessendovi vituarie è inexpugnabile, benché el signor Turcho tien uno loco a la bocha di quel colfo chiamato Castelnuovo, dove ha bona custodia di zente e artilarie.