Tamen, par havesse abuto la licentia di andar a Corfù; ma non ancora di vegnir a Cataro.
     
      Item, che intendeva la barza nostra capitanio Andrea Loredan era stata sopra Trapano et verso le aque di Piombino, et che de lì via in Cicilia si ritrovava, con gran reputation di la Signoria.
     
      [1497 06 17]A dì 17 ditto, nel consejo di pregadi fo messo parte di elezer per scurtinio 2 synichi a le terre da mar, con grandissima libertà et utilità, havendo la mità dil netto et di le pene. Dovesseno andar in Dalmatia, Albania, Grecia, Candia, Arzipielago, [651] Cypri et in Puja in le terre di novo abute, et che menasseno 2 canzilieri con loro etc. Et acciò non havesseno alcuna passione, fo etiam preso parte che non potesseno esser balotadi niuno che zà anni 12 havesse abuto rezimento niun in dicte terre de mar, né pare, fio, frar et zenero da anni 6 in qua. Et cussì fono electi: Piero Sanudo, fo di pregadi, et Luca Trum, fo di pregadi, el qual era in leto amalato. Et licet fusseno di qualche gravità, pur per l'autorità havea aceptono. Et è da saper, che fono dicti synichi per conforto di li citadini et maxime di quelli di Puja, che pur se intendeva etc. Et fo decreto, primo dovesseno andar a synichar in Puja.
     
      [1497 06 16]A dì 16, a hore una di note, in questa terra fo un terremoto sensibile. Durò per spazio di una Ave Maria. Non fé alcun danno.
     
      [1497 06 19]A dì 19, partì di questa terra Zorzi Pixani doctor et cavalier, andava orator al re di romani el qual si ritrovava a Spiera. Et andoe per la via di Padoa, poi a Verona et Trento, et li fo fato la sua comissione, et mandata driedo justa il consueto.