Come la peste continuava in quella cità, et che era quasi tuta svudata. Et de Zustignam Morexini proveditor nostro etiam vene lettere, come li era morto uno suo famejo da peste, et che dubitava molto, et etiam che fiorentini non facesseno qualche arsalto a Pisa. Tamen, fiorentini mantenivano la trieva. Et in questi giorni fo mandato danari lì a Pisa, et ritornò Piero di Santi che per la Signoria fo mandato a Pisa a veder quelle raxon, perhoché era stà mandati più di 100 milia ducati, et quelli conti era molto intrigati.
     
      Di Domenego Malipiero proveditor di l'armata, etiam lettere di 14 date a Portovenere. Come avia recevuto lettere di la Signoria di la licentia di dover andar a Corfù, et che il zorno sequente si partiria senza star più a indusiar.
     
      Da Cataro, di Francesco Cigogna, de 10 de l'instante. Come havia adatato le cosse con turchi, zoè che quelle zente erano partite senza far altra novità, come ho scripto.
     
      Di Corfù, dil capitano zeneral nostro. Che ivi [653] si ritrovava venuto da Coron, dove era stato, et era sollo con la sua galia. Et che Hironimo Contarini proveditor di l'armata, a dì 24 mazo si era partito con 2 galie, zoè soracomito Zuan Francesco Venier et Jacomo Loredam, et andava a la volta di l'Arzipielago, per veder et asegurar quelli lochi de' corsari.
     
      Non voglio restar da scriver come, in questo mexe, a Piove di Sacho acadete, che ritrovandosi uno povero vilan poverissimo, non havendo da seminar, par andasse da alcuni zudei, con li qual convene che li dovesse dar formento per semenar quatro campi che havia a la parte.