Dil principe de Squilazi fratello dil prefatto ducha, minime. Dil ducha de Urbino etiam semo chiari. Idio perdoni chi è stato! Per tanto, havemo deliberato non atender più a niuna cossa; né haver cura di el papato, né di la vita nostra. Et questo pensier di la Chiesia et di regular quella; il modo dil viver et di la persona nostra propria; ogni corectione ponerla in mano de sei de vuj nostri fratelli reverendissimi cardinali che al [654] presente prononcierò, insieme con do auditori di rota. Et etiam che, de caetero, li beneficij si dagi per merito et non per niuna altra cossa, et che tutti vuj cardinali habi a dar il voto suo, et quello che per la magior parte sarà deliberato, sia fermo." Et altre parole disse di questo medemo tenor et in altra forma; ma la sustantia fo questa. Et prononcioe questi 6 cardinali, zoè do episcopi, do preti et do diaconi: el reverendissimo cardinal di Napoli et el cardinal de Lisbona episcopi; l'alexandrino et Santa Praxede, olim Santa Anastasia preti, et el cardinal di Siena et San Zorzi dyaconi. Ai quali dette ogni podestà, come ho scripto di sopra. Et tamen questi non se reduseno poi mai a uno, et non feno alcuno ordine, come si credeva dovesseno far, perché, de li pocho, el papa si mutoe etc. Et compito che hebbe el pontifice di parlar, si levò in piedi domino Gracilasso de la Vega orator yspano, et disse. "Beatissime pater, io ho da far una excusatione a la vostra sanctità per el reverendissimo cardinal Ascanio vice cancelier, el qual, nomine suo, mi doglio a la vostra beatitudine di la morte dil ducha di Gandia, et che 'l saria venuto in concistorio a dolersi; ma che, dubitando di le zanze che vien ditto per questa terra che lui l'ha fatto amazar, et che 'l si ha fatto capo di la parte Orsina, la qual cossa el prega v. b. non voglia creder, et che, quando piace a quella, el vegnirà a justifichar.