Tutta la terra mormorava di questa sì grande audatia, di haver fallito et ancora voller esser aldito, perché quel excellentissimo consejo di X con la zonta non l'haveria casso, si le cosse non fusseno state chiare. Tamen, perché non era publichà per ribello, poteva star in questa terra, et etiam per esser zenthilomo nostro, perhoché, del 1389, el signor Zuam Francesco suo avo fue azonto a la dignità dil mazor consejo, dil mexe di april, lui et soi fioli e descendenti di legiptimo matrimonio. Questo [666] signor marchexe, oltra che restava debitor di ducati 20 milia di danari haveano abuto di più, etiam a l'oficio dil sal era debitor per salli tolti zercha ducati 8000, et in Rialto a diverse persone, maxime a nostri zenthilomeni, di ducati zercha ... milia, di li qual era piezo Antonio di Ruberti da Padoa et Piero d'Albam spicier, per sivanze havia facto. Et è da saper che l'ultima paga di questo mexe di zugno, volendo el suo ambasador levar la bolleta et pagarsi a la camera di Padoa justa il solito, per la Signoria fo scrito a li rectori di Padoa dovesseno mandar dicta paga, ch'era duc. 3000, in questa terra. Et cussì fo portata per Lucha Poschà, et messa in deposito in la procuratia; la qual cossa chi l'havesse saputa, si arebbe judichato il successo, benché forsi si arìa dicto che la Signoria non volleva più esser intachata, tamen con il suo capitano non guardava a danari, imo li dava quel dimandava.
     
      [1497 06 21]A dì 26 ditto, el luni, solicitando pur ditto signor marchexe di esser aldito, et mandava suo cuxin misier Phebus con li do oratori a dimandar a la Signoria che li concedesse tal gratia che lo aldiseno, perché 'l voleva mostrar chi era li traditori, et che questa cossa li era stà oposta per suo cugnato ducha de Milam et per quel Galeazo et li altri severineschi soi nimicissimi, et che lhoro haveano facto le lettere false che mostrava fusse stà intercepte etc.