Tramava contra la Signoria nostra da la qual havia recevuto tanti beneficii. Et cussì alias suo avo signor Zuam Francesco, etiam hessendo a soldo di la Signoria nostra, si acordoe col ducha Philippo Maria Anglo de Milano, et rompendo in Lombardia insieme con Nicolò Picenin tolse Verona et molte castelle dil brexam. Et tamen etiam in quella guerra nostri restono vincitori: siché questi di Gonzaga altre fiate ha facto a la Signoria nostra tal cosse, chome legendo le croniche si vede. Questo marchexe era zenero dil ducha di Ferara, et olim cugnato dil ducha de Milano; affine dil re don Fedrico di Napoli; cugnato etiam dil ducha Guido de Urbino, et havia parentato con molti altri signori, et haveva il meglior tempo che niun altro signor de Italia. Et a questo modo perse la gratia de la illustrissima Signoria nostra.
     
      Et el ducha de Milano, inteso tal cassassione che l'orator nostro la comunichoe, disse: "Che 'l si dolleva in quanto che 'l signor marchexe era suo carissimo parente, et che non poteva si non laudar quello haveva facto lo excelso consejo di X, el qual sapeva feva le sue cosse molto ponderosamente etc.
     
     
      Questi erano et fono dil consejo di X quando tratono la materia soprascritta.
     
      El serenissimo principe nostro.
     
      Consejeri.
     
      Ser Jacomo Lion.
      Ser Marco Foscolo.
      Ser Alvixe Bragadin.
      Ser Nicolò Trivixam.
      Ser Bernardo Zustignan.
      Ser Benetto da cha da Pexaro.
     
      Avogadori di comun.
     
      Ser Zuam Francesco Pasqualigo, doctor et cavalier.
      Ser Piero Duodo.
      Ser Antonio Loredam el cavalier.
      [668]Consejo di X.