In questi giorni, fo divulgato era in questa terra venuto incognito di Franza el cardinal San Piero in Vincula, alozato in cha Arian a San Rafael. Tamen, non fu vero. Pur tutta la terra era piena, et che 'l voleva vegnir ad habitar a Padoa, et havia tolto la caxa di Amadi populari di questa terra ad afficto, ch'è fuora di la porta di San Zuane. Et anche a Padoa in la rena era il cardinal Zen; ma dapoi che si partì di Roma, più ritornato. Or la verità non fu che 'l Vincula qui fusse, ma ben vene uno suo secretario in questa terra, et andoe a la Signoria, chiamato Piero Zuane da Furlì. Quello tratasse, era secreto, et el dicto cardinal San Piero in Vincula ancora era in Franza.
     
     
     
      Dil mexe di lujo 1497.
     
      [1497 07 04]A dì 4 lujo, vene lettere da Roma de 28. Come el pontifice havia inteso la cassacion dil marchexe di Mantoa, et che non poteva se non laudar la serenissima Signoria nostra et quel excellentissimo consejo di X, et judichava fusse processo et fatto tutto con justicia. Come era de lì lettere de 19 da Lion che 'l cardinal San Piero in Vincula, molto contento di l'acordo facto col pontifice, si dovea partir et vegnir in Italia, et vegneria verso Bologna. Et che 'l volleva conzar prima certe sue cosse de lì in Franza per li beneficii che l'ha, et subito si partiria. Et che 'l pontifice voleva etiam lui elezer legato in Spagna uno episcopo, et che Spagna mal volontiera volleva vi fusse de lì legato con auctorità, perhò, manderia episcopo. De li cardinali 6 electi non fu facto altra mentione, adeo el pontifice era come mai a voler governar la sedia, et parea volesse far zente per cessar le discordie di le parte erano in le terre a la romana Chiesia subposte.