Adesso ho inteso che tu hè un savio et potente signor de la Signoria de Venetia, et da ti spiero che farete che sia adimpido el comandamento de l'imperador, et la paxe che hè fra el fortunato imperador et la Signoria se fortificha et non se rompi. Et se non volete adimpir questo comandamento de l'imperador per questa cossa, sapiè de certo paxe et l'amititia che è fra el grando imperador e la Signoria tu haverai desfato. Et da ti mando subasi de l'imperador Cadar beg. Quel che ve parlerà da parte nostra, credetilo, che son le parole mie, et Dio augumenti la Signoria vostra.
      Servitor, FERISBERG DE SCUTARI.
     
      Copia de la risposta del clarissimo zeneral al sanzacho antiscritto.
     
      Marchiò Trevisan etc. al magnifico et de ogni laude et honor degno, el signor Firisbego sanzacho de Scutari etc. la degna salutation. L'è vegnudo da nui el savio et prudente homo Cadarbego subassi vostro ambassador, et have portado una lettera de la signoria la qual ne dixe vuj esser venuto in queste contrade per tuor el paese del signor Zorzi Cernovich, subzonzando questo esser de mente de la excelentia del Gransignor, et che non vogliamo contrariar al voler suo perché la sua excelentia intende observar et mantegnir la paxe che l'ha con la illustrissima Signoria nostra, et non la voler romper né violar per algun muodo. Nui havemo visto molto volentiera el vostro ambassador per respetto de la signoria vostra, et havemolo etiam molto ben inteso in tutto quello che per parte vostra el ne ha dito. Ve respondemo che semo anche nui de questa medema opinion de mantegnir la bona paxe et amicitia, come scrivete, et perhò, che del paexe fo del Cernovich nui non ne impazemo, né volemo impazarse cossa alguna; ma disemo ben che Garbli et le saline son state et sono de la nostra illustrissima Signoria, come se mostra per carte antige et per confirmation del Gransignor morto, et anche per questo grande imperador che è vivo, ordenade con la sua boca d'oro; et quelle havemo sempre tegnudo et possesso, et tegnimo de presente et possedemo.