Et anche lì a Carpi si ritrovava in la soa parte el signor Lionello con la moglie, el qual si stava in uno palazo bellissimo, sopra il qual era dipente l'arme dil re di Franza con queste lettere: Vivam, Vincam, et Regnabo. Questo feno quando de lì passò monsignor de Monpensier, al principio che 'l re vene in Italia. Or el signor Gilberto, con el signor Frachasso ch'è suo parente, feno insieme acordo di tuor il dominio a questi soi cusini et quelli scaziar di Carpi; et questo è da judichar facesse con volontà dil signor ducha di Milano, dil qual erano soi soldati, et dil suo consejo secreto, et maxime vedendo al presente era venuto il tempo, zoè per esser stà casso el marchexe di Mantoa da li stipendii nostri, el qual era suocero di Alberto, come ho scripto di sopra. Et cussì, a dì 3 lujo, esso signor Frachasso, non con molti di soi, andoe a Carpi fenzando vegnir a visitar suo fratello Antonio Maria, et intrato, prese le porte. Poi vi vene el signor Gilberto, et cussì, a dì 4, comenzoe insieme con li partesani a cridar: Viva Gilberto etc. et voler discaziar li cusini, maxime Lionello che ivi si trovava, el qual con la moglie se era reduto in la parte soa di la rocha. Et tandem, intervenendo l'exortatione di domino Taliano da Carpi, ch'è nostro condutier et che ivi si ritrovava a le soe possessione, el qual impetrò dal signor Gilberto e sti severineschi che esso Lionello con la moglie et la sua roba potesseno ussir et andar fuori di Carpi. Et obtenuto questo, esso Lionello, con la moglie, se ne vene a la Mirandola dal signor Galeoto, ch'è fratello di sua madre, et lo pregoe li volesse dar ajuto a reponerlo nel stato.