Et la Signoria tolse rispeto a risponderli fin tre zorni, poi li rispose, come scriverò di soto. El ducha di Ferara, volendo interponerse in adatar queste diferentie, mandoe per el signor Gilberto che a Ferara vi andasse, e scrisse a la Signoria nostra come, se a quella piaceva, vederia di conzar quelle diferentie, acciò per questa picola cossa non venisse qualche gran incendio in quelli lochi, peroché 'l Bentivoy mandoe alcuni fanti propinqui, li qualli perhò non passoe perché el marchexe di Ferara non volse. Et ancor el marchexe di Mantoa era volenteroso di far qual cossa; pur non si mosse. In Carpi si era el signor Frachasso et Antonio Maria di Sanseverino con dicto signor Gilberto, et la Signoria scrisse a Milano che era buono di adatar queste cosse, et el ducha preditto poi, per l'orator suo, a dì 13 notifichoe come el ducha di Ferara voleva conzarle, et che in consonantia li havia scripto. Adoncha fo risposo a li oratori di Mantoa che non era da muoversi, volendo pacifice el ducha di Ferara conzar quelle discordie. Et cussì esso signor marchexe non si mosse. Quello seguirà, scriverò più avanti. Non voglio restar di scriver et far mentione, come di questi signori de Carpi ne era uno chiamato Zuam Lodovico, el qual fo fratello dil signor ... et a Ferara li fo fato tagliar la testa, per esser stà ribello dil ducha Borso. Di questo rimase et la madre ancor vive, e si hè rimaridata nel [683] marchexe Lunardo Malaspina ch'è signor di alcuni castelli in Lunesana, la qual fu Orsina et sorella di la moglie fo di Lorenzo di Medici.