E vedendo esser menati in longo, partino desperati, e più tosto elexeno darsi di volontà al Turcho che esser mal tratati da' catarini. Questi dimandavano, benché fusseno soto Cataro, voler pagar soi dreti a Cataro e haver retor da per sì a suo spexe, e non star suzeti a Cataro. Et a l'incontro catarini alegava la Signoria averli acetadi con le ville sudite, e fato i privilegii non doveva seperarli. Tandem diti caxali si deteno al Turcho, et si feno soi carazari.
     
     
      [1497 07 09]A dì 9 lujo vene lettere di Zuam Morexini luogotenente nostro in la Patria di Friul, et di Sebastiam Zantani provedador a Gradischa, de 6 de l'instante. Come il zorno avanti todeschi, mossi da Gorizia, veneno lì a l'incontro de l'Isonzo dove era stà per nostri fabricato uno molin in le juridition del capitulo di Aquileja, et quello brusoe, che fu di gran incomodità e danno di li habitanti in quella citadella de Gradischa, perché potevano reputar haver el ditto molin nel centro di quel loco. Per la qual cossa, si convegnerà andar mia 5 lontam, con gran incomodità. Et che veneno dicti todeschi armati assà quantità. El numero non sapeva; ma judichava fusse più di 200, et perhò dimandava che la Signoria provedesse a mandar fanti o altri in quel loco di Gradischa, perché, stagando cussì senza esser custodita ne era pericolo, né altri ivi si ritrovava se non Polo da Zara contestabele, che de lì stava senza compagnia.
     
      Item, che dapoi, a hore cercha 19, nel dito zorno era venuto lì in Gradischa uno sudito nostro a cavalo cridando: Todeschi sono a Brama, loco distante de lì zercha do balestrade, sopra una possesion tenuta per Polo da Zara predito, et che havia circondato el ditto Polo in caxa, et se presto non era soccorso, l'era tagliato a pezi con tutta la fameglia.