Et in questi giorni vene in questa terra uno chiamato Zuam Francesco Rustigella, di natione vicentino, el qual era in bando di terra e luogi di la Signoria nostra, insieme con Baxilio da la Scuola nominato di sopra, per haver amazato uno fiol che fo di Antonazo di Dozia. Or quando Marco Sanudo fo in Savoia orator, quel ducha, per esser el dito molto suo, al qual haveva dato più di ducati 10 milia et era gran maistro, pregoe dicto orator, et scrisse etiam a la Signoria che lo volesse asolver dil bando. Et cussì, in questo tempo, per il consejo di X, li fo dato salvo conduto per 100 anni a requisition di esso ducha. La qual cossa have molto acepta, et perhò vene in questa terra a ringratiar la Signoria, poi a Turin tornoe dal signor suo ducha. Questo è huomo molto gajardo e praticho dil mondo.
     
     
      [1497 08 05]A dì 5 avosto, intravene la note in questa terra, che ritrovandosi in prexon a San Marcho molti carzerati, sì per la vita qual confinati a morir in prexon, al numero forsi ... si acordono insieme a voler fuzir. Et feno uno capitano lhoro, che fu Lodovico Fioravante che fé amazar il padre a li Frati Menori in chiesia la note di venere santo, et li proveditori era Marco Corner da la barba confinato a morir per sodomito, et Beneto Petriani per ladro, et assà altri. Or questi, a dì 4 da sera, ebbeno modo, quando li guardiani andono a far la cercha in le prexon, di pigliarli e tuorli le arme, et cussì andono di prexon in prexon rompendo. Et fatossi forti, erano venuti fino in la prexon novissima, et pocho manchava a romper e ussir fuora.